சீனாவில் நடைபெற்ற சர்வதேசப் போட்டியில் வெற்றி பெற்ற மலேசிய ரேலி சாம்பியன் குணசீலன் ராஜுவை மஇகா விளையாட்டுப் பிரிவு கௌரவித்தது

கோலாலம்பூர்:

சீனாவின்  யுன்னான் மாநிலத்தில் உள்ள மைல் நகரில் இந்த மாத தொடக்கத்தில் நடைபெற்ற 2026 மைல் சர்வதேச ஆட்டோ ரேலி சாம்பியன் போட்டியில் வெற்றி பெற்ற மலேசிய ரேலி சாம்பியன் குணசீலன் ராஜுவை கௌரவிக்கும் வகையில் மஇகா விளையாட்டுப் பிரிவு ஒரு சிறப்புப் பாராட்டு நிகழ்வை ஏற்பாடு செய்தது.

தேசிய ​மஇகா உதவித் தலைவர் டத்தோ டி. முருகையா, மஇகா விளையாட்டுப் பிரிவுத் தலைவர் ஆண்ட்ரூ டேவிட் ஆகியோர் தலைமையில் நடைபெற்றது. 

இந்த நிகழ்வில் சர்வதேச அரங்கில் குணசீலன் ஈட்டிய வியக்கத்தக்க சாதனையை இருவரும் வெகுவாகப் பாராட்டினர்.

​குணசீலனின் இந்த வெற்றி மலேசிய மோட்டார் விளையாட்டுத் துறைக்கு மட்டுமின்றி, ஒட்டுமொத்த மலேசிய இந்திய சமூகத்திற்கும் பெருமை சேர்க்கும் ஒரு தருணம் என்று டத்தோ முருகையா விவரித்தார்.

​சீனாவில் குணசீலன் ராஜு அடைந்துள்ள மிகச்சிறந்த சாதனையை எண்ணி நாங்கள் பெருமிதம் கொள்கிறோம்.

15 ஆண்டு இடைவேளைக்குப் பிறகு மீண்டும் போட்டிக்குத் திரும்பி, உடனடியாக ஒரு சர்வதேச சாம்பியன் போட்டியில் வெற்றியைப் பெறுவது என்பது உண்மையிலேயே அசாதாரணமானது, ஊக்கமளிக்கக்கூடியது. 

அவரது உறுதி, கட்டுப்பாடு மற்றும் ஆர்வம் ஆகியவை உண்மையான மலேசிய உணர்வைப் பிரதிபலிக்கின்றன.

​மஇகா மத்திய செயற்குழு உறுப்பினருமான குணசீலன், விளையாட்டு மற்றும் சமூக ஈடுபாடுகளில் தொடர்ந்து ஆக்கபூர்வமான பங்களிப்பை வழங்கி வருவதாக டத்தோ முருகையா மேலும் குறிப்பிட்டார்.

​குணசீலன் அர்ப்பணிப்புமிக்க சேவையாளராகவும் இருந்து வருகிறார். இந்த முக்கியமான வெற்றியை அவருடன் இணைந்து கொண்டாடுவதில் நாங்கள் பெருமைப்படுகிறோம். 

மஇகா, அதன் தலைமைத்துவத்தின் சார்பில், அவரின் சர்வதேச வெற்றிக்கு எனது மனமார்ந்த வாழ்த்துகளைத் தெரிவித்துக் கொள்கிறேன். 

சீனாவில் நடைபெறவுள்ள எஞ்சிய இரண்டு சுற்றுப் போட்டிகளிலும் அவர் வெற்றி பெற்று, இந்த ஆண்டின் இறுதியில் ஒட்டுமொத்த சர்வதேச தொடர் சாம்பியனாக உருவெடுக்க வேண்டும் என்று நாங்கள் வாழ்த்துகிறோம்.

​இதற்கிடையில், மஇகா விளையாட்டுப் பிரிவுத் தலைவர் ஆண்ட்ரூ டேவிட், குணசீலனின் சாதனை பல மலேசியர்களுக்கு, குறிப்பாக இளைய தலைமுறைக்கு உத்வேகம் அளித்துள்ளதாகப் புகழ்ந்தார்.

​இந்த வெற்றி நம் அனைவருக்கும் பெருமிதத்தைத் தேடித்தந்துள்ளது. 

குறிப்பாக 15 ஆண்டுகள் ரேலி விளையாட்டிலிருந்து விலகி இருந்த பிறகு, இத்தகைய சாதனையைப் படைப்பது எளிதான காரியமல்ல. 

ஆர்வம், அர்ப்பணிப்பு, உறுதி இருந்தால் வயது ஒரு தடையல்ல என்பதை குணசீலனின் மீளுருவாக்கம் நிரூபித்துள்ளது என்று அவர் கூறினார்.

- பார்த்திபன் நாகராஜன்