விதிமீறலா அல்லது விபத்தா?: விருதுநகர் வெடிவிபத்து குறித்து தீவிர விசாரணை தொடக்கம்

விருதுநகர்: 

தமிழகத்தின் பட்டாசு உற்பத்தி மையமான விருதுநகர் மாவட்டம் அருகே இன்று நிகழ்ந்த கோர வெடிவிபத்து மாநிலத்தையே உலுக்கியுள்ளது. இங்குள்ள ஒரு பட்டாசுத் தொழிற்சாலையில் ஏற்பட்ட பயங்கர வெடிப்புச் சம்பவத்தில், அங்கு பணியில் இருந்த தொழிலாளர்கள் 23 பேர் பரிதாபமாக உயிரிழந்தனர். விபத்தின் தீவிரத்தினால் அந்தப் பகுதியே கரும்புகை மண்டலமாக மாறியுள்ளது.

விபத்து குறித்த தகவல் கிடைத்தவுடன் தீயணைப்பு, மீட்புப் படையினர் விரைந்து வந்து தீயைக் கட்டுக்குள் கொண்டு வரும் பணிகளில் ஈடுபட்டனர். எனினும், ஆலைக்குள் இருந்த வெடிபொருட்கள் அடுத்தடுத்து வெடித்துச் சிதறியதால் மீட்புப் பணியில் பெரும் சவால்கள் ஏற்பட்டன. 

இந்த விபத்தில் காயமடைந்த பல தொழிலாளர்கள் சிகிச்சைக்காக அருகிலுள்ள அரசு மருத்துவமனைகளில் அனுமதிக்கப்பட்டுள்ளனர்.

அவர்களின் நிலைமை கவலைக்கிடமாக இருப்பதால், உயிரிழப்பு எண்ணிக்கை மேலும் அதிகரிக்கக்கூடும் என அஞ்சப்படுகிறது.

இந்த விபத்து எவ்வாறு நிகழ்ந்தது என்பது குறித்து மாவட்ட நிர்வாகமும் காவல்துறையும் முதற்கட்ட விசாரணையைத் தொடங்கியுள்ளன.

பட்டாசு தயாரிப்பின் போது ஏற்பட்ட உராய்வு காரணமாகத் தீ விபத்து ஏற்பட்டிருக்கலாம் அல்லது விதிமுறைகளை மீறி அதிகப்படியான மருந்துப் பொருட்கள் கையாளப்பட்டதா என்ற கோணத்தில் விசாரணை முடுக்கிவிடப்பட்டுள்ளது. 

உயிரிழந்த தொழிலாளர்களின் குடும்பங்களுக்குத் தமிழக அரசு, பல்வேறு தலைவர்கள் ஆழ்ந்த இரங்கல்களைத் தெரிவித்துள்ளனர்.

தொழிலாளர்களின் பாதுகாப்பை உறுதி செய்யக் கோரி அப்பகுதி மக்கள் வலியுறுத்தி வரும் நிலையில், விபத்துக்குக் காரணமானவர்கள் மீது கடுமையான நடவடிக்கை எடுக்கப்படும் என அதிகாரிகள் தரப்பில் உறுதி அளிக்கப்பட்டுள்ளது.

-கிரித்திக்கா