அமெரிக்க தாக்குதலைத் தொடர்ந்து கார்க் தீவில் மின்விநியோகம் துண்டிக்கப்பட்டது

இஸ்தான்புல்: 

அமெரிக்காவின் தொடர் தாக்குதல்கள் 50 க்கும் மேற்பட்ட இடங்களை குறிவைத்ததைத் தொடர்ந்து, பாரசீக வளைகுடாவில் அமைந்துள்ள ஈரானின் கார்க் தீவில் செவ்வாய்க்கிழமை மின்விநியோகம் துண்டிக்கப்பட்டதாக அனடோலு ஏஜென்சி செய்தி நிறுவனம், அமெரிக்க, ஈரானிய ஊடகங்களை மேற்கோள் காட்டி தெரிவித்துள்ளது.

பல ஈரானிய ஊடக சேனல்கள், அமெரிக்க இராணுவம் அந்தத் தீவின் மீது நடத்திய தாக்குதலுக்குப் பிறகு மின் தடை ஏற்பட்டதாக தெரிவித்தன.

வால் ஸ்ட்ரீட் ஜேர்னல் செய்தித்தாள், அமெரிக்க போர் விமானங்கள் ஈரானுக்குச் சொந்தமான அந்தத் தீவில் உள்ள 50 க்கும் மேற்பட்ட இராணுவ இலக்குகளைக் குண்டுவீசித் தாக்கியதாக தெரிவித்தது.

இதற்கு முன்னர், ஈரானின் மெஹ்ர் செய்தி நிறுவனம், அமெரிக்க, இஸ்ரேலிய போர் விமானங்கள் அந்தத் தீவில் பல வான் தாக்குதல்களை நடத்தியதாகவும், இது பல வெடிப்புகளை ஏற்படுத்தியதாகவும் தெரிவித்தது.

இதுவரை, உயிரிழப்புகள் அல்லது சேதம் குறித்த கூடுதல் விவரங்கள் எதுவும் தெரிவிக்கப்படவில்லை.

கடந்த வாரம், அமெரிக்க ஜனாதிபதி டொனால்ட் டிரம்ப், கார்க் தீவில் உள்ள அனைத்து இராணுவ இலக்குகளும் 'முற்றிலுமாக அழிக்கப்பட்டுவிட்டன' என்று கூறினார்.

ஈரானின் முக்கிய எண்ணெய் ஏற்றுமதி முனையமுமான கார்க் தீவைக் கைப்பற்றுவது, பரிசீலனையில் உள்ள விருப்பங்களில் ஒன்றாகும் என்று சுட்டிக்காட்டி, ஈரானின் எண்ணெயைக் 'கட்டுப்படுத்த' விருப்பம் இருப்பதாகவும் டிரம்ப் தெரிவித்தார்.

இஸ்ரேலும் அமெரிக்காவும் பிப்ரவரி 28 ஆம் தேதி ஈரான் மீது தாக்குதலைத் தொடங்கியதிலிருந்து பிராந்திய பதற்றம் தொடர்ந்து அதிகரித்து வருகிறது. அப்போதைய உச்ச தலைவர் அயத்துல்லா அலி கமெனி உட்பட 1,340 க்கும் மேற்பட்டோர் உயிரிழந்துள்ளனர்.

சமீப நாட்களில் ஈரான் அதிகாரிகள் இறப்பு எண்ணிக்கையைப் புதுப்பிக்கவில்லை.
ஈரான், இஸ்ரேல், ஜோர்டான், ஈராக், அமெரிக்க இராணுவ சொத்துக்களைக் கொண்ட வளைகுடா நாடுகளைக் குறிவைத்து ட்ரோன், ஏவுகணைத் தாக்குதல்களை நடத்தி பதிலடி கொடுத்துள்ளது. இதன் விளைவாக உயிரிழப்புகள், உள்கட்டமைப்பு சேதங்கள் ஏற்பட்டுள்ளதுடன், உலகளாவிய சந்தைகள், விமானப் போக்குவரத்துத் துறையும் பாதிக்கப்பட்டுள்ளது.

-சங்கீர்த்தனா