இன்றைய பாடல்களால் ஈடு செய்ய முடியாத 70-களின் ராயா இசை: டத்தோ டிஜே டேவ்

பெட்டாலிங் ஜெயா: 

1970களின் ஹரி ராயா பாடல்களின் தனித்துவமான கவர்ச்சி, சமகால வெளியீடுகளால் ஈடுசெய்ய முடியாததாகவே உள்ளது என்று மூத்த பாடகர் டத்தோ டிஜே டேவ் நம்புகிறார்.

என்றென்றும் விரும்பப்படும் 'மென்ஜெலாங் ஹரி ராயா' பாடலுக்காகப் பிரபலமான 78 வயதான இந்தக் கலைஞர், இன்றைய இளம் இசையமைப்பாளர்களின் தரமான பணிகளைப் பாராட்டினார்.

முந்தைய தசாப்தங்களின் "ஈர்ப்பு" புதிய பாடல்களில் ஏன் இல்லை என்று அவர் சிந்தித்தார்.மேலும், தனது சொந்த வெளியீடான 'மெரியா சவால்' பாடல் எதிர்பார்ப்புகளைப் பூர்த்தி செய்யாத ஒரு உதாரணமாகவும் குறிப்பிட்டார்.

"எந்தக் கூறு குறைவாக இருக்கிறது என்று எனக்குத் தெரியவில்லை, அது இசையாக இருக்கலாம் அல்லது பாடல் வரிகளாக இருக்கலாம்," என்று அவர் கூறினார்.

வானொலி நிலையங்கள் பல புதிய ராயா பாடல்களை ஒலிபரப்பினாலும் கேட்பவர்கள் தொடர்ந்து பழைய பாடல்களையே நாடுகின்றனர் என்று அவர் குறிப்பிட்டார்.

 இர்வான் ஷா அப்துல்லா என்கிற டிஜே டேவ் , 1970களின் இசையின் சிறப்புக்கு அதன் புரட்சிகரமான காலமே காரணம் என்றும், அது முதலில் ராக் அண்ட் ரோல், பின்னர் டிஸ்கோவால் வளர்ச்சியடைந்தது என்றும் கூறினார்.

அவரது புகழ்பெற்ற பாடலான 'மென்ஜெலாங் ஹரி ராயா' 1977-ல் பதிவு செய்யப்பட்டு, அடுத்த ஆண்டு பரவலான பிரபலத்தைப் பெற்றது.

அக்காலத்தில் மூன்று வானொலி நிலையங்களில் அது ஒலிபரப்பப்பட்டதைக் கேட்ட உற்சாகத்தை அவர் நினைவு கூர்ந்தார், இந்தப் பாரம்பரியம் கிட்டத்தட்ட 50 ஆண்டுகளுக்குப் பிறகும் தொடர்கிறது.

Yayasan Kebajikan Artis Tanahair (YKAT) தலைவர் என்ற முறையில் பேசிய அவர், மூத்த கலைஞர்களுக்கு ஆதரவளிக்கும் அறக்கட்டளையின் பணிகளையும் எடுத்துரைத்தார்.

YKAT, நோய் அல்லது நிதிச் சிக்கல்களை எதிர்கொள்ளும் எட்டு மூத்த கலைஞர்களுக்கு மாதம் RM500 ஓய்வூதியம் வழங்குகிறது.

இந்த அறக்கட்டளை மருத்துவச் செலவுகளுக்கு உதவுவதோடு மேலும் ஒரு முறை வழங்கப்படும் உதவி போதுமானதாக இல்லையென்றால் பலமுறை உதவி வழங்கலாம்.

சமீபத்தில் நடந்த நோன்பு திறப்பு விழாவில், YKAT அமைப்பு 60, அதற்கு மேற்பட்ட வயதுடைய 17 மூத்த கலைஞர்களுக்கு தலா RM1,000 உதவியை வழங்கியது.

பெறுநர்களில் பாடகர்களான சோஹைமி மியோர் ஹசன், ஃபேருஸ் ஹுசின், அத்துடன் நடிகர்களான ஸைதி ஓமர், ஃபரித் அமிருல் ஹிஷாம் வு அப்துல்லா ஆகியோர் அடங்குவர் என்றார் அவர்.

-சங்கீர்த்தனா