காமன்வெல்த் பாராளுமன்ற மாநாட்டில் கலந்துகொள்ள தமிழக சட்டப் பேரவைத் தலைவர் அப்பாவு மலேசியா வழியாக ஆஸ்திரேலியா செல்கிறார் 

சென்னை: 

தமிழக சட்டப்பேரவை தலைவர் மு.அப்பாவு காமன்வெல்த் பாராளுமன்ற மாநாட்டில் பங்கேற்க ஆஸ்திரேலியா செல்கிறார். முன்னதாக, அவருக்கு முதல்வர் மு.க.ஸ்டாலின் வாழ்த்து தெரிவித்தார். 

ஆஸ்திரேலியா நாட்டின் சிட்னியில் வருகிற 5ஆம் தேதி முதல் 8ஆம் தேதி வரை நடைபெற இருக்கும் 67ஆவது காமன்வெல்த் பாராளுமன்ற மாநாட்டில் தமிழகப் பிரதிநிதியாக பேரவை தலைவர் மு.அப்பாவு கலந்து கொள்கிறார்.

சட்டமன்ற பேரவை செயலக கூடுதல் செயலாளர் பா.சுப்பிரமணியம் மாநாட்டின்போது நடைபெறும் SOCATT கூட்டங்களில் கலந்து கொள்கிறார். 

தமிழக சட்டப்பேரவை தலைவர் அப்பாவு மற்றும் கூடுதல் செயலாளர் சீனிவாசன் ஆகியோர் மாநாட்டில் கலந்து கொள்வதற்காக நேற்று (2ம் தேதி) இரவு 11.25 மணிக்கு  சென்னையில் இருந்து சிங்கப்பூர் சென்றடைந்தார். அங்கிருந்து மலேசியா நாட்டிற்கு வருகை தருகின்றார். பின்பு சிட்னி நகருக்கு 5ம் தேதி சென்றடைவார்கள்.

இந்நிலையில், முதல்வர் மு.க.ஸ்டாலின் நேற்று தலைமை செயலகத்தில் உள்ள சட்டப்பேரவை தலைவர் அறையில் சட்டப்பேரவை தலைவர் மு.அப்பாவுவை சந்தித்து, ஆஸ்திரேலியா நாட்டின், சிட்னி நகரில் நடைபெற உள்ள 67வது காமன்வெல்த் பாராளுமன்ற மாநாட்டில் கலந்துகொள்ள செல்வதையொட்டி அவருக்கு சால்வை அணிவித்து வாழ்த்து தெரிவித்தார். 

பேரவை தலைவர் அப்பாவு, கூடுதல் செயலாளர் சுப்ரமணியம் ஆகியோர் இந்த மாநாட்டில் கலந்துகொண்ட பிறகு நியூசிலாந்து நாட்டிற்கு சென்று, பின்னர் 17ம் தேதி  சென்னை திரும்புகின்றனர்.

- ஆர்யன்