2025இல் புனித ஹஜ் பயணம் மேற்கொள்ள 900 சிங்கப்பூர் முஸ்லிம்களுக்கு அனுமதி 

சிங்கப்பூர்:

2025ல் புனித ஹஜ் பயணம் மேற்கொள்ள இருக்கும் ஏறத்தாழ 900 புனிதப் பயணிகள் நவம்பர் 5 முதல் சிங்கப்பூர் இஸ்லாமிய சமய மன்றத்திடமிருந்து (முயிஸ்) அதிகாரப்பூர்வ கடிதங்களைப் பெறுவர் என்று தெரிவிக்கப்பட்டுள்ளது.

தேர்வு செய்யப்பட்டோருக்கு இதுகுறித்து குறுஞ்செய்தி, மின்னஞ்சல் வழியாக தெரியப்படுத்தப்படும் என்று முயிஸ் வெள்ளிக்கிழமை வெளியிட்ட செய்தி அறிக்கையில் தெரிவித்தது.

தேர்ந்தெடுக்கப்பட்ட யாத்திரிகர்கள், தாங்கள் மருத்துவ ரீதியாக தகுதியாக உள்ளோமா என்பதை மருத்துவ நிபுணர்களிடம் சென்று பரிசோதித்துக்கொள்ள வேண்டும் என்று முயிஸ் அறிவுறுத்தி உள்ளது..

தகவல் கிடைத்தவுடன், புனிதப் பயணிகள் MyHajSG இணையத்தளத்துக்குச் சென்று கடிதத்தைப் படிக்கலாம். தங்கள் இடத்தை உறுதிசெய்துகொள்ள, அனுமதி பெற்ற பயண முகவையிடமிருந்து ஹஜ் தொகுப்புத் திட்டத்தை வாங்க வேண்டும். அத்துடன், அந்த இணையத்தளத்தில் பட்டியலிடப்பட்டுள்ள இதர தகுதிக்கூறுகளை நவம்பர் 17க்குள் அவர்கள் பூர்த்திசெய்ய வேண்டும் என்று அறிவிக்கப்பட்டுள்ளது.

சிங்கப்பூரின் 11 பயண முகவைகளுக்கு முயிஸ் ஒப்புதல் அளித்துள்ளது. அவை மொத்தம் 28 ஹஜ் தொகுப்புத் திட்டங்களை வழங்குகின்றன.

- ரோஷித் அலி