தலைநகரில் அதிரடி சோதனை 500 சட்டவிரோத அந்நிய நாட்டினர் கைது

கோலாலம்பூர்:

தலைநகரில் அமலாக்க அதிகாரிகள் கடும் சோதனை நடவடிக்கைகளை மேற்கொண்டனர்.

இந்த சோதனை நடவடிக்கையின் போது 500 சட்டவிரோத அந்நிய நாட்டினரை அதிகாரிகள் கைது செய்துள்ளனர்.

கோத்தா ராயா ஜாலான் சிலாங்கில் 1,000த்திற்கும் அதிகமாக அமலாக்க அதிகாரிகள் இந்த அதிரடி சோதனை நடவடிக்கையில் ஈடுபட்டனர்.

போலீஸ், குடிநுழைவு அதிகாரிகள், பொது நடவடிக்கை பிரிவு அதிகாரிகள் இச்சோதனை நடவடிக்கைகளில் ஈடுபட்டனர்.

மதியம் 1 மணியளவில் நடந்த இச்சோதனையின் வாயிலாக 500க்கும் மேற்பட்ட அந்நிய நாட்டினர் கைது செய்யப்பட்டனர்.

முறையான பயணம், வேலை ஆவணம் இல்லாதது உட்பட பல குற்றங்களின் அடிப்படையில் அவர்கள் அனைவரும் கைது செய்யப்பட்டுள்ளனர்.

சட்டவிரோத நடவடிக்கைகளைத் தடுக்கவும், வெளிநாட்டினருக்குச் சொந்தமான அல்லது வேலை செய்யும் வணிகத் தலங்களை அடையாளம் காணும் நோக்கில் இந்த சோதனை நடத்தப்பட்டது என்பது குறிப்பிடத்தக்கது.

- பார்த்திபன் நாகராஜன்