16ஆவது மலாக்கா மாநிலத் தேர்தலுக்கான அரசியல் ஒத்துழைப்பை தேசிய முன்னணி விரைவில் அறிவிக்கும்: ஜம்ரி

கோலாலம்பூர்:

16ஆவது மலாக்கா மாநிலத் தேர்தலை எதிர்கொள்வதற்காக, மற்ற கட்சிகளுடனான அரசியல் ஒத்துழைப்பின் திசை மற்றும் வடிவம் குறித்து தேசிய முன்னணி விரைவில் அதிகாரப்பூர்வ முடிவை எடுக்கும்.

மலாக்கா மாநில அளவில் உள்ள அனைத்து தேசிய முன்னணி தலைவர்களுடனும் கட்சியின் உயர்மட்டத் தலைமை விரிவான கலந்துரையாடல்களை நடத்திய பிறகு இந்த முடிவு இறுதி செய்யப்படும் என்று தேசிய முன்னணி பொதுச் செயலாளர், டத்தோஶ்ரீ டாக்டர் ஜம்ரி அப்துல் காதிர் அறிவித்தார்.

கட்சியின் உள்ளகப் பேச்சுவார்த்தை அமர்வு முடிந்த உடனேயே, தேசிய முன்னணி தலைவர், டத்தோஶ்ரீ டாக்டர் அஹ்மத் ஸாஹித் ஹமிடி, இது குறித்து அதிகாரப்பூர்வ அறிவிப்பை வெளியிடுவார் என்றும் அவர் விளக்கினார்.

தற்சமயம் தேசிய முன்னணியின் தலைமையின் முக்கிய கவனம், நிர்வாகத் தயாரிப்புகள், தேர்தல் ஆணையத்தால் தீர்மானிக்கப்படும் அதிகாரப்பூர்வ தேர்தல் செயல்முறை ஆகியவற்றில் முழுமையாகக் குவிந்துள்ளது என்று அவர் கூறினார்.

முன்னதாக 15ஆவது மலாக்கா மாநில சட்டமன்றம் கலைக்கப்படுவது குறித்து மலாக்காவின் முதலமைச்சர் டத்தோஶ்ரீ அப் ரவுஃப் யூசோ வெளியிட்ட அதிகாரப்பூர்வ அறிவிப்பைத் தொடர்ந்து இந்த அரசியல் நிகழ்வு ஏற்பட்டுள்ளது.

- பார்த்திபன் நாகராஜன்