எரிசக்தி, நீரை முறையாகவும் சிக்கனமாகவும் பயன்படுத்த பொதுமக்கள் கேட்டுக்கொள்ளப்படுகிறார்கள்: துணைப் பிரதமர் ஃபதில்லா

புத்ராஜயா: 

பொதுமக்கள் எரிசக்தியையும் நீரையும் திறமையாகவும் சிக்கனமாகவும் பயன்படுத்த கேட்டுக் கொள்ளப்படுகிறார்கள்.  ஈகைத் திருநாள் பண்டிகைக் காலத்தில் இந்த இரண்டு வளங்களின் நுகர்வும் பொதுவாக அதிகரிப்பதால் இது அறிவுறுத்தப்படுகிறது.

துணைப் பிரதமரும் எரிசக்தி மாற்றம், நீர் உருமாற்ற அமைச்சருமான டத்தோஸ்ரீ ஃபதில்லா யூசோஃப், பண்டிகைக் காலங்களில் வீட்டு உபயோக மின்சார நுகர்வு பொதுவாக 20 முதல் 40 சதவீதம் வரை அதிகரிக்கும் என மதிப்பிடப்பட்டுள்ளது என்று கூறினார்.

"பயன்படுத்தப்படாதபோது மின் சாதனங்களை அணைப்பது உட்பட, மின்சாரத்தைச் சேமிக்கும் எளிய நடவடிக்கைகளைப் பின்பற்றலாம்.

"கூடுதலாக, சாதனங்களை ஸ்டாண்ட்-பை பயன்முறையில் வைத்திருப்பதைத் தவிர்க்கவும்; குளிரூட்டியின் வெப்பநிலையை சுமார் 24 முதல் 26 டிகிரி செல்சியஸ் வரை அமைக்கவும்; மேலும் நான்கு அல்லது ஐந்து நட்சத்திர ஆற்றல் திறன் மதிப்பீட்டுடன் கூடிய மின்சார சாதனங்களைப் பயன்படுத்தவும்," என்று அவர் இன்று ஒரு அறிக்கையில் கூறினார்.

மேலும், விடுமுறையைக் கழிக்கத் திரும்பும் பயணிகளிடையே  பெரும்பாலான மாநிலங்களில், நீர் பயன்பாடு 30 முதல் 35 சதவீதம் வரை அதிகரிக்கும் என்று எதிர்பார்க்கப்படுகிறது, மேலும் தேவை முடிந்தவரை திறம்பட பூர்த்தி செய்யப்படுவதை உறுதிசெய்ய நீர் வழங்கல் ஆபரேட்டர்கள் தயார் நிலையில் உள்ளனர்.

"பண்டிகைக் காலத்தில் எதிர்பாராத சம்பவங்கள் ஏதேனும் ஏற்பட்டால், செயல்பாட்டாளர்கள் அவசரகாலத் திட்டங்களுடன் தயாராக இருப்பதை தேசிய நீர் சேவைகள் ஆணையமும் (SPAN) உறுதி செய்கிறது," என்று அவர் தெரிவித்தார்.

சர்வதேச இலக்குகளுக்கு இணங்க, ஒரு நாளைக்கு ஒரு நபருக்கான நீர் நுகர்வு அதிகபட்சம் 160 லிட்டராக இருக்க வேண்டும் என்பதையும் PETRA மூலம் எரிசக்தி மாற்றம், நீர் மாற்ற அமைச்சகம் (SPAN) இலக்காகக் கொண்டுள்ளது.

பரிந்துரைக்கப்பட்ட நீர் சேமிப்பு நடவடிக்கைகளில், உள் குழாய் கசிவுகளை சரிசெய்வதும் பயன்பாட்டிற்குப் பிறகு குழாய்களை இறுக்கமாக மூடுவதும் ஆகியவை அடங்கும் என்று ஃபதில்லா கூறினார்.

மேலும், முற்றத்தைத் துடைப்பது போன்ற முக்கியமற்ற பணிகளுக்கு மழைநீர் சேகரிப்பு போன்ற மாற்று நீர் ஆதாரங்களைப் பயன்படுத்தவும்; நீர் பயன்பாட்டில் ஒழுக்கத்தைக் கடைப்பிடிக்கவும் என்று அவர் வலியுறுத்தினார்.

கூடுதலாக, மாசுபடாத நீரை மீண்டும் பயன்படுத்துவதும், இரண்டு அல்லது மூன்று நட்சத்திர நீர் சேமிப்பு லேபிள் கொண்ட தயாரிப்புகளைத் தேர்ந்தெடுப்பதும், மாதாந்திர கட்டணங்களில் சராசரியாக 50 சதவீதம் சேமிக்க உதவும்.

மின் பாதுகாப்புக் கண்ணோட்டத்தில், பொதுமக்கள் தங்கள் வீட்டு வயரிங் பாதுகாப்பாக இருப்பதை உறுதி செய்வதையும், மாதத்திற்கு ஒரு முறையாவது 'T' சோதனைப் பொத்தானை அழுத்தி தங்கள் மீதமுள்ள மின்னோட்டத் தடுப்பினை (RCD) சோதிப்பதையும் பெட்ரா நினைவூட்டுகிறது.

"RCD சரியாக வேலை செய்தால், அது துண்டித்து மின்சார விநியோகத்தை உடனடியாக நிறுத்திவிடும்.

"இருப்பினும், அது வேலை செய்யவில்லை அல்லது மாற்றப்பட வேண்டியிருந்தால், தயவுசெய்து எரிசக்தி ஆணையத்திலிருந்து பதிவுசெய்யப்பட்ட ஒரு மின்சாரப் பணியாளரை வைத்து அதைச் சரிசெய்யவும்," என்று அவர் கூறினார்.

மற்ற நடவடிக்கைகளில், கம்பிகள் சேதமடையாமல் இருப்பதை உறுதி செய்தல், மின்சார சாகேட்களில் அதிகப்படியான சுமையை ஏற்றாமல் இருப்பது, பாதுகாப்பு முத்திரைகள் கொண்ட சாதனங்களைப் பயன்படுத்துதல் ஆகியவை அடங்கும்.

முறையான எரிசக்தி, நீர் பயன்பாட்டைப் பின்பற்றுவதன் மூலம், பொதுமக்கள் இந்தப் பண்டிகைக் காலத்தை இன்னும் பாதுகாப்பாகக் கொண்டாடுவது மட்டுமல்லாமல், நாட்டின் எதிர்கால மேம்பாட்டுத் தேவைகளைப் பூர்த்தி செய்வும் முடியும். 

மேலும், எரிசக்தி, நீரின் நிலையான, மீள்திறன் மிக்க போதுமான விநியோகத்தை உறுதி செய்யும் நாட்டின் நோக்கத்திற்கும் ஆதரவளிக்க முடியும் என்றார் அவர்.

-சங்கீர்த்தனா