தமிழ்ப்பள்ளிகளில் திருவள்ளுவர் சிலையை அகற்றும் ஜொகூர் கல்வி இலாகாவின் உத்தரவு கண்டனத்துக்குரியது: தங்க கணேசன்

கோலாலம்பூர்:

ஜொகூர் கல்வி இலாகாவால் தமிழ் பள்ளிகளில் நிறுவப்பட்டிருந்த திருவள்ளுவர் சிலையை அகற்றுமாறு வழங்கப்பட்ட உத்தரவை இந்து சங்கம் மிகத் தீவிரமாகக் கண்டிக்கிறது.

இது தமிழ் பண்பாடு, மொழி, சமூகவளர்ச்சி ஆகியவற்றின் அடிப்படை மதிப்புகளைப் பாதிக்கும் ஒரு செயலாகும்

மலேசிய இந்து சங்கத்தின் தலைவர் தங்க கணேசன் கூறினார்.

திருவள்ளுவர் என்பவர் உலகம் வணங்கும் தமிழ் தத்துவஞானி.

அறம், பொருள், இன்பம் என மனித வாழ்வின் முழுமையையும் உள்ளடக்கிய திருக்குறளின் மூலம் அவர் வழங்கிய காலத்தால் அழியாத போதனைகள் தமிழ் பள்ளிகளில் கல்வி கற்கும் குழந்தைகளுக்குப் பெரும் வழிகாட்டுதலாகும்.

திருக்குறள் மாணவர்களின் குணநலன்களைப் பேணுகிறது.

நல்லொழுக்கம், ஒழுக்கநெறி, ஒற்றுமை, மனித நேயம் ஆகியவற்றை வளர்க்கிறது.

தமிழ்ப்பள்ளிகளில் மொழி, பண்பாட்டு அடையாளத்தை வலுவாக்கும் முக்கியமான கருவியாக திகழ்கிறது.

திருவள்ளுவர் சிலை என்பது வெறும் ஒரு உருவம் மட்டுமல்ல; அது தமிழ் கல்வியின் அடிப்படை ஆன்மாவையும், நெறிமுறைகளையும், பண்பாட்டு பெருமையையும் பிரதிபலிக்கிறது. இந்தச் சிலைகளை அகற்றுவது தமிழ் கல்வியின் தத்துவ மரபை மறுக்கும் செயலாகும்.

மலேசிய இந்து சங்கம் பல ஆண்டுகளாக தமிழ் பள்ளிகளில் சமய கல்வி மற்றும் நெறி பயிற்சியின் அவசியத்தை தொடர்ந்து வலியுறுத்தி வருகிறது.

மாணவர்கள் ஒழுக்கம், மரியாதை, சமூக பொறுப்பு ஆகியவற்றில் வளர்ந்து, நல்ல குடிமக்களாக உருவாக வேண்டியதன் முக்கியத்துவத்தை நாம் அடிக்கடி முன்வைத்துள்ளோம்.

திருவள்ளுவர் கொள்கைகள்இந்த வளர்ச்சியில் தவிர்க்க முடியாதவை.

ஆகையால்  ஜொகூர் கல்வித் துறையின் இச்செயல் உடனடியாக திரும்பப் பெறப்பட வேண்டும்.

தமிழ் கல்வியின் அடையாளங்களைப் பாதுகாப்பதும், மாணவர்களின் மனப்பாங்கை கட்டியெழுப்பும் கல்வி சூழலை உறுதி செய்வதும் கல்வி அதிகாரிகளின் பொறுப்பாகும்.

தமிழர் பண்பாட்டை மதிக்கும் வகையில், திருவள்ளுவர் சிலையை அகற்றும் உத்தரவை ரத்து செய்ய கல்வி அமைச்சகத்தையும், ஜொகூர் கல்வி இலாகாவை மலேசிய இந்து சங்கம் வலியுறுத்திக் கோருகிறது என்று அவர் கூறினார்.

- பார்த்திபன் நாகராஜன்