அவர் என் மகன்; கிள்ளானில் மகன் சுட்டுக் கொல்லப்பட்டதால் மன உளைச்சலுக்கு ஆளான தாய்

கிள்ளான்:

தாமான் மெஸ்ரா இந்தா பகுதியில் இன்று இரவு நடந்த ஒரு சம்பவத்தில் தனது மகன் சுட்டுக் கொல்லப்பட்டதை அறிந்ததும், அவரின் தாய் என்று நம்பப்படும் ஒரு மாது துக்கத்தில் மூழ்கினார்.

பாதிக்கப்பட்டவரைப் பார்ப்பதற்காக அவர் இரவு 11.15 மணியளவில் பலருடன் சம்பவ இடத்திற்கு வந்தார்.

ஆனால் பணியில் இருந்த போலிஸ் அதிகாரிகளால் அவர் தடுத்து நிறுத்தப்பட்டார்.

அவர் என் மகன்! என் மகன்! என்று அம்மாது மிகவும் வருத்தத்துடன் அழுதார்.

பின்னர் காவல்துறையினரும் பொதுமக்களும் அவரை ஆறுதல்படுத்தினர்.

முன்னதாக, 12, 20 வினாடிகள் நீளமுள்ள இரண்டு வீடியோ பதிவுகள் சமூக ஊடகங்களில் பரவின.

அதில் நான்கு சக்கர வாகனத்திற்குள் ஒரு நபர் மயக்கமடைந்து கிடப்பதைக் காட்டியது.

இந்த சம்பவம் இரவு 9 மணியளவில் நடந்ததாக நம்பப்படுகிறது.

மேலும் பல சாட்சிகள் தொடர்ச்சியான துப்பாக்கிச் சூட்டுச் சத்தங்களைக் கேட்டதாகக் கூறப்படுகிறது.

இருப்பினும் இது இன்னும் உறுதிப்படுத்தப்படவில்லை.

சம்பவ இடத்தில் இருந்த கே9 பிரிவுகள், தடயவியல் குழுக்கள் இன்னும் விசாரணைகளை நடத்தின என்பது குறிப்பிடத்தக்கது.

- பார்த்திபன் நாகராஜன்