பாதிரியாரைக் கத்தியால் தாக்கிய ஆடவன் இன்று குற்றஞ்சாட்டப்பட்டான்

சிங்கப்பூர்: 

அப்பர் புக்கிட் தீமாவிலுள்ள St Joseph's தேவாலயத்தில் பாதிரியாரைக் கத்தியால் குத்தியதாக 37 வயது ஆடவர் மீது குற்றஞ்சாட்டப்பட்டுள்ளது.

சிங்கப்பூரரான பஸ்நாயக்க கீத் ஸ்பென்சர் (Basnayake Keith Spencer) நேற்று முன்தினம் (9 நவம்பர்) பிள்ளைகள் பங்கேற்ற கூட்டுப் பிரார்த்தனையின்போது தாக்குதலை நடத்தியதாகக் கூறப்படுகிறது.

மாலை சுமார் 6.30 மணிக்கு அவர் மடக்கக்கூடிய கத்தியை வைத்து பாதிரியார் கிறிஸ்டஃபர் லீயின் (Christopher Lee) வாய்ப்பகுதியில் குத்தியதாகக் குற்றஞ்சாட்டப்பட்டுள்ளது. 

அவரிடம் மேலும் 4 ஆயுதங்கள் இருந்ததாகக் காவல்துறையினர் கூறினர்.

ஸ்பென்சர் தம்மைக் கிறிஸ்துவர் என்று குடிநுழைவுச் சோதனைச்சாவடிகள் ஆணையத்திடம் முன்பு கூறியிருந்தார்.

தாக்குதல் சமய அடிப்படையிலோ பயங்கரவாத அடிப்படையிலோ நடத்தப்பட்டதற்கு ஆதாரம் இல்லை என்று காவல்துறை தெரிவித்தது.

ஆபத்தான ஆயுதத்துடன் ஒருவருக்குக் கடுமையான 
காயங்களை விளைவிக்கும் குற்றத்துக்கு 15 ஆண்டுகள் வரை சிறைத்தண்டனையுடன் அபராதம் அல்லது பிரம்படிகள் விதிக்கப்படலாம்.

இந்நிலையில் மருத்துவமனையில் பாதிரியாருக்கு அறுவைச் சிகிச்சை மேற்கொள்ளப்பட்டு அவருடைய உடல்நிலை சீராய் இருப்பதாகத் தெரிவிக்கப்பட்டுள்ளது.

-மவித்திரன்