காஸாவில் 10 ஆயிரத்தை தாண்டிய உயிரிழப்பு: சவக் குவியலாக மாறியதால் போரை நிறுத்த ஐ.நா. வலியுறுத்தல்

காசா சிட்டி:

கடந்த மாதம் 7ம் தேதி முதல் காசாவில் இஸ்ரேல் நடத்தி வரும் தாக்குதலில் உயிரிழந்தவர்களின் எண்ணிக்கை 10 ஆயிரத்தைக் கடந்தது. குழந்தைகளின் சடலங்கள் சவக் குவியலாக கிடப்பதால் உடனடியாக போரை நிறுத்த ஐ.நா. பொதுச் செயலர் அன்டோனியோ குட்டெரெஸ் வலியுறுத்தியுள்ளார்.

காசா சுகாதாரத் துறை அமைச்சகம் வெளியிட்டுள்ள அறிக்கையில், கடந்த 31 நாள்களாக இஸ்ரேல் நடத்தி வரும் கொடூர தாக்குதலில் இதுவரை 10,022 பேர் உயிரிழந்துள்ளனர்.

அவர்களில் 4,104 பேர் சிறுவர்கள் ஆவர். இது தவிர, இந்தத் தாக்குதல்களில் 2,660 பேர் மாயமாகியுள்ளனர்; 25,408 பேர் காயமடைந்துள்ளனர் என்று அந்த அறிக்கையில் குறிப்பிடப்பட்டுள்ளது.

மேற்குக் கரை பகுதியில் இஸ்ரேல் ராணுவத்தாலும், யூத குடியிருப்புவாசிகளாலும் கொல்லப்பட்ட பாலஸ்தீனர்களின் எண்ணிக்கை திங்கள்கிழமை 148ஆக அதிகரித்துள்ளது.

- ஆர்யன்