மலேசியா 2026–2027 வரை ஐஎம்ஓ வாரிய உறுப்பினராக உள்ளது: 11ஆவது முறையாக வெற்றியைப் பதிவு செய்துள்ளது

கோலாலம்பூர்:

2026–2027 காலத்திற்கான அனைத்துலக கடல்சார் அமைப்பின் சி வகை வாரிய  உறுப்பினராக மலேசியா மீண்டும் தேர்ந்தெடுக்கப்பட்டுள்ளது.

இதன் மூலம் நேற்று நவம்பர் 28 அன்று லண்டனில் நடந்த 34ஆவது ஐஎம்ஓ பொதுச் சபையுடன் இணைந்து நடைபெற்ற தேர்தலில் தொடர்ச்சியாக 11ஆவது வெற்றியை பதிவு செய்துள்ளது.

தேர்தல் அமர்வில் நாட்டின் பிரதிநிதிகள் குழுவிற்கு போக்குவரத்து துறை துணையமைச்சர் டத்தோ ஹாஜி ஹஸ்பி ஹபிபுல்லா தலைமை தாங்கினார்.

அவர் வாக்களிப்பு செயல்பாட்டில் மலேசியாவை மற்ற உறுப்பு நாடுகளுடன் பிரதிநிதித்துவப்படுத்தினார்.

வெற்றிகரமான மறுதேர்தல், நம்பகமான மூலோபாய பங்காளியாக மலேசியாவின் ஆக்கபூர்வமான பங்கில்,

குறிப்பாக உலக அளவில் கடல்சார் பாதுகாப்பு, சுற்றுச்சூழல் பாதுகாப்பு மற்றும் திறன் மேம்பாட்டு முயற்சிகள் ஆகியவற்றில் அனைத்துலக கடல்சார் சமூகத்தின் தொடர்ச்சியான நம்பிக்கையின் வெளிப்பாடாக விவரிக்கப்படுகிறது.

சி வகை வாரிய உறுப்பினராக இருப்பது, அனைத்துலக கப்பல் பாதுகாப்பு,  கடல்சார் சுற்றுச்சூழல் நிலைத்தன்மை தரங்களை வலுப்படுத்துவது உட்பட, அமைப்பின் முக்கியமான கொள்கைகள், முடிவுகளை வகுப்பதில் மலேசியா தொடர்ந்து தீவிரமாக பங்களிக்க உதவுகிறது.

இந்தத் தொடர்ச்சியான தேர்தல், பிராந்திய கப்பல் மையமாக மலேசியாவின் மூலோபாய நிலைப்பாட்டிற்கு ஏற்ப, பாதுகாப்பான, நிலையான, போட்டித்தன்மை வாய்ந்த உலகளாவிய கடல்சார் நிகழ்ச்சி நிரலை இயக்குவதற்கான நாட்டின் உறுதிப்பாட்டையும் இது பிரதிபலிக்கிறது.

- பார்த்திபன் நாகராஜன்