மெஸ்ஸியின் மரபு என்றென்றும் நிலைத்திருக்கும்: பெக்காம்

புளோரிடா:

அனைத்துலக அரங்கிலிருந்து தனது ஓய்வை அறிவித்த அர்ஜெண்டினா ஜாம்பவான் லியோனல் மெஸ்ஸியின் மரபு என்றென்றும் நிலைத்திருக்கும் என்று டேவிட் பெக்காம் கூறினார்.

39 வயதான மெஸ்ஸி, தனது நாட்டிற்காக 207 போட்டிகளில் பங்கேற்று 125 கோல்களை அடித்த பிறகு, அர்ஜெண்டினாவுடனான தனது அற்புதமான விளையாட்டு வாழ்க்கையின் முடிவை உறுதிப்படுத்தினார்.

பார்சிலோனாவின் முன்னாள் நட்சத்திரமான இவர், கத்தாரில் நடைபெற்ற 2022 உலகக் கிண்ணத்தை அர்ஜெண்டினா வெல்லவும் உதவினார். 

மேலும், கடந்த ஜூலை மாதம் ஸ்பெயினுக்கு எதிரான உலகக் கிண்ண இறுதிப் போட்டியில் தேசிய அணிக்காக அவர் கடைசியாக விளையாடினார்.

அர்ஜெண்டினா, பார்சிலோனா அணிகளுடனான மெஸ்ஸியின் அபாரமான ஆட்டம், அவரை உலக கால்பந்து வரலாற்றில் மிகச்சிறந்த வீரர்களில் ஒருவராக உயர்த்தியது.

இதற்கிடையில், பெக்காம், ஒரு எதிராளியாகவும், தற்போது அந்த வீரர் பிரதிநிதித்துவப்படுத்தும் கிளப்பான இந்தர்மியாமியின் இணை உரிமையாளராகவும் மெஸ்ஸியின் மகத்துவத்தை நேரடியாகக் காணும் வாய்ப்பைப் பெற்றார்.

இன்ஸ்டாகிராமில் ஒரு பதிவின் மூலம், இங்கிலாந்தின் முன்னாள் கேப்டன், உலகெங்கிலும் உள்ள மில்லியன் கணக்கான குழந்தைகளுக்கு உத்வேகமாக விளங்கும் மெஸ்ஸிக்கு வாழ்த்து தெரிவித்தார்.

ஒரு கனவுடன் இருந்த குழந்தையின் மகத்துவத்தைக் காணும் பாக்கியம் பெற்ற நாம், இப்போது திரும்பிப் பார்த்து அதை உணர வேண்டிய நேரம் இது என்று பெக்காம் கூறினார்.

மெஸ்ஸி தனக்கும் தன் குடும்பத்திற்கும் பெருமைக்குரியவர் மட்டுமல்ல, களத்திலும் களத்திற்கு வெளியேயும் தனது தலைமைத்துவம், முன்மாதிரியின் மூலம் அர்ஜெண்டினாவுக்குப் பெருமையையும் கொண்டு வருகிறார் என்று பெக்காம் கூறினார்.

- பார்த்திபன் நாகராஜன்