"பணத்திற்காக பெட்டி சுமந்தேன்": வெளிநாட்டில் போதைப்பொருள் கடத்திய மலேசியர் கைது

சிட்னி: 

சிட்னி விமான நிலையத்தில் மலேசியாவைச் சேர்ந்த நபரின் பயணப் பெட்டியில் மறைத்து வைக்கப்பட்டிருந்த மெத்தாம்பேட்டமைனை இறக்குமதி செய்ய முயன்ற குற்றச்சாட்டின் பேரில், அவரை ஆஸ்திரேலிய காவல்துறை கைது செய்துள்ளதாக சின்ஹுவா செய்தி நிறுவனம் தெரிவித்துள்ளது.

 வியாழக்கிழமை தாய்லாந்திலிருந்து சிட்னிக்கு வந்த 66 வயதான அந்த நபரை, அவரது உடைமைகளைச் சோதனை செய்யுமாறு கேட்டுக் கொண்டதாக ஆஸ்திரேலிய கூட்டாட்சி காவல்துறை (AFP), ஆஸ்திரேலிய எல்லைப் பாதுகாப்புப் படை (ABF) ஆகியவை வெள்ளிக்கிழமை வெளியிட்ட ஒரு கூட்டு அறிக்கையில் தெரிவித்தன.

அந்த நபரின் உடைமைகளின் எக்ஸ்-ரே ஸ்கேனில் ஒரு அசாதாரணமான விஷயம் கண்டறியப்பட்டதைத் தொடர்ந்து நடந்த சோதனையில், வாசனைத் திரவியப் பொடி என்று முத்திரையிடப்பட்ட 10 பாட்டில்களில் 5 கிலோகிராம் மெத்தாம்பேட்டமைன் இருப்பது தெரியவந்தது.

அந்த மலேசியர் கைது செய்யப்பட்டு, எல்லைக் கட்டுப்பாட்டு மருந்தின் வணிக அளவை இறக்குமதி செய்ய முயன்ற குற்றச்சாட்டின் கீழ் வழக்குப் பதிவு செய்யப்பட்டுள்ளார்.

குற்றம் நிரூபிக்கப்பட்டால், அவருக்கு அதிகபட்சமாக ஆயுள் தண்டனை விதிக்கப்படும்.

பணம் பெறுவதற்காக தாய்லாந்திலிருந்து ஆஸ்திரேலியாவுக்குப் பெட்டிகளைக் கொண்டு வர சமூக ஊடகங்கள் வழியாகத் தாம் ஆள்சேர்ப்பு செய்யப்பட்டதாக அந்த நபர் அதிகாரிகளிடம் கூறியதாக அரசுத் தரப்பு நீதிமன்றத்தில் வாதிடும் என்று AFP, ABF தெரிவித்தன.

தடயவியல் பரிசோதனைக்காக இரண்டு கைபேசிகளும் புலனாய்வாளர்களால் பறிமுதல் செய்யப்பட்டுள்ளன.

-சங்கீர்த்தனா