கடத்தல் சதித்திட்டத்தின் 26 முக்கிய நபர் இலக்குகளில் கிளையன் எம்பாப்பேவும் ஒருவர்

பாரிஸ்:

பிரான்சில் ஒரு குற்றக் கும்பலால் நடத்தப்பட்ட கடத்தல் சதித்திட்டத்தில், ரியல் மாட்ரிட் நட்சத்திர வீரர் கிளையன் எம்பாப்பே உள்ளிட்ட பல முக்கியப் பிரமுகர்கள் குறிவைக்கப்பட்டுள்ளதாக அந்நாட்டு அதிகாரிகள் தெரிவித்துள்ளனர்.

கால்பந்து வீரர்கள், ராப் பாடகர்கள், செல்வந்த தொழிலதிபர்கள் உட்பட 26 முக்கியப் பிரமுகர்களை இந்த சதித்திட்டம் குறிவைத்ததாக நம்பப்படுகிறது.

கிளமென்ட் எல் என அடையாளம் காணப்பட்ட 18 வயது இளைஞர் ஒருவரால் இந்தச் சதித்திட்டம் தீட்டப்பட்டதாகக் கூறப்படுவதாக பிரெஞ்சு செய்தித்தாளான 'லெ பாரிசியன்' செய்தி வெளியிட்டது.

பாரிஸில் ஒரு கடிகாரத் தயாரிப்பாளரைத் தாக்கியதில் ஈடுபட்ட இரு நபர்களில் ஒருவராக அடையாளம் காணப்பட்டதைத் தொடர்ந்து, இந்த முக்கியக் குற்றவாளி இதற்கு முன்னர் ஆயுதக் கொள்ளை வழக்கில் சிறையில் அடைக்கப்பட்டிருந்தார்.

விபச்சாரம், திட்டமிட்ட கொள்ளை வழக்குகளில் கிளமென்ட் எல் முன்பு தற்காலிகக் காவலில் வைக்கப்பட்டிருந்ததும் விசாரணையில் தெரியவந்தது.

இந்தக் கும்பலின் தலைவன் கைது செய்யப்பட்டான்.

ஆனால் அவன் தனது சிறை அறைக்குள் இருந்தபடியே, 'லெஸ்டர் இசட்' என்ற புனைப்பெயரில் ஸ்னாப்சாட் செயலியைப் பயன்படுத்தி இரண்டு கைபேசிகள் மூலம் தொடர்ந்து உத்தரவுகளை அனுப்பி வந்ததை அதிகாரிகள் பின்னர் கண்டறிந்தனர்.

விசாரணைக்கு நெருக்கமான ஒரு வட்டாரம் 'லெ பாரிசியன்' பத்திரிக்கையிடம், எம்பாப்பே உட்பட 26 செல்வந்தர்களின் முகவரிகள் அந்தக் கைபேசிகளில் கண்டறியப்பட்டதாகத் தெரிவித்தது.

- பார்த்திபன் நாகராஜன்